النصيحــــــــــــــه

الزمن غدار والدنيا تدور
والعمر يمضي وحنا ضايعين

غرنا ليل السهر مزح وسرور
ما ذكرنا رحله اليوم الحزين

الودايع ضمها وقتن يبور
والحقايق واضحه ضمن السنين

والحظيظ اللي على الدنيا صبور
مؤمن بالله ودرب المؤمنين

لا تضايق خاطره هم ودبور
قرب المصحف وحطه فاليمين

ورتله من صادق احساس وشعور
ووكل همومه لرب العالمين

يا هنيه ما اندفع فالوقت ثور
وانطلق كنه عمى ماله عوين

غرته الآمال واصحاب الشرور
واتبع درب الجهل والفاسقين

فرق واضح دون راي ودون شور
فرق يا أصحاب العقول الفاهمين

الحياه دروس تحتاج لحضور
تستفيد تفيد فالشي الثمين

والخطا لو صار من بعض القصور
لا تمادى عدل الزله بحين

والرفيق اللي على الرفقه غيور
احرص لقربه وقرب الغانمين

ولا تسمع رأي خايب ومعثور
احفظ الخوه من هروج اللعين

ولا تدقق في مثل بعض الأمور
دام تمشي وسع الخاطر تزين

ولا تكلم فالخفا بصوتن جهور
وفاللقا تسكت مع اللي ساكتين

أن حضرت فعطر المجلس بخور
ريح خير وريح عز وريح دين

المدايح ما نبيها قول زور
دور أهل الطيب والفعل السمين

النهايه وين والدنيا عبور
ما كسبها كود رجالن فطين

استفد من مجمل الفكره سطور
واكسب اللي تقدره قبل الونين

والنصيحه في طبق ورد وزهور
سقتها لأهل الوفا قافن متين

والسلام ختام والدنيا تدور
والرجاء فالله يرد الضايعين

كلمات رائعة جدا
راق لي طرحك كثيرا
كم أنت رائعة
بأنتظار جديدك الرائع
مودتي لك

مشكوره ياعمري على مرورك