يجهل الجاهل على جهل الجهـول
======= ويتحمل من جهل جهـل الجـــهـال
لا سقا الله ساعـة بالعثيـم مـول
======= رحت أودي حــرمتي عــقب الــــزوال
واختبرت القلب في ساعة فضـول
======= كنت اظنه راسيــــن مثـل الجبـال
مادريت انه على الفلـس محبـول
======= وقيـده الـــلـــي مايـــرده والعـقـال
جيت سوقن جامعن من كـل زول
======= الكـداري والقــمــاري والــــــغـزال
قمت اطالع واتمشـى فـي ذهـول
======= وا تلفت من يمــيـن ومـــن شــمـال
وارتبشت وطحت في باب الدخـول
======= طـحت مــابين الــمحاسـب والسـلال
والسبب من داعج العيـن البتـول
======= فوق رمـــشـه حاجبـه كنـه اهــلال
سيف خشمه والوجن ورد(ن) ذبـول
======= ومــن ورا الشــيله لخديـه اشتعــــال
والثنايـا فـي تبسمهـا الخجـول
======= ساطـــعات(ن) سابحـات(ن) بـــالـــزلال
وعنقها مفهوق والكتـف مهـدول
======= والمــشي مــــشي الــرزينـات الثقـــال
والخصر ملهوف والردف معـزول
======= يابو نايــف كنهــا بعـض الــدلال
وصدرها مزموم والجيـب محلـول
======= وان مــشــت جـاني من الهز اختـلال
والردايف لامشـت شـي يهـول
======= من تحت ثوبه غـــدا لهـــــن اجتـوال
كـن ردفـه بالطلـوع وبالنـزول
======= لامشت يعــطي دروســــن للــــضـــــــــلال
أو يحرج من يسـوم وكـم نقـول
======= او بـــروق(ن )مـــرهشاتـن فـي خيـــــــــــال
وشفت شين بس مـاودي اقـول
======= وشفـــت شـــين غيــــر هــــذا مايقــــــــال
اشهد انه سجلـت بالقلـب قـول
======= وكبري (ن ) بالكبد من تحـت الطحـــــــال
تلـعـب الفـتبـــول وايضا الـــهارت بـــول
======= مـــايجـــاريهـا الـنـصـر وإلا الــهــــــــــلال
وارسل الشيطان من عنده رسـول
======= امتخـــصــص فـي علـوم الانحــــــــــــــلال
قـال يالله قـم تحـرك ياكسـول
======= مـــاتلاقـي غــيرهـا فـي هــالـكمــــــــــــال
وجيتها خايف ولا ادري ويش اقول
=======واستحت هي وابعدت بنت الحـــــــــــــــــلال
وجيت اكلمها وإ يلا تقل إمغيـول
=======وراح صوتي وصار بالعين احــــــــــــــولال
واتشجع قلـت يابنـت إمعقـول ؟
=======كل هذا فيـك مـن زيـن وجمــــــــــــــــــــــال
قالت ابعـد قلـت ماشيـن يحـول
======= بيننا واللـي تبيـن بـلا ســــــــــــــــــــــــــؤال
قالت اسمع مانت جاهل بالاصـول
======= ضف وجهك لافضحك بين الرجــــــــــــــال
قلت يالله بـس هرجـك لايطـول
=======وادفع فلـوس المقاضـي بالريـــــــــــــــــــال
بالمرق وجهي مع الناس مغسـول
======= ماستحى قالت اجـل قـرب تعـــــــــــــــــــال
واخطفت قوطي من الادراج( فـول)
======= المدمس العريـض مـن الطــــــــــــــــــوال
وصكت(ن) به صكت القـرم الكتـول
=======وشقت الجبهه ودم الـراس ســــــــــــــــــال
ثم قامت تضرب(ن) باللـي تطـول
======= وافزعت معهـا علـي ام العيـــــــــــــــــــال
وافزعن كل الحريـم بـدون قـول
======= يضربنـي بالقواطـي والـحــــــــــــــــــــــلال
وبالمكانس والصوانـي والسطـول
======= والعجايـز يفزعـن لـو بالتفـــــــــــــــــــــال
اخلطنـي خلـط عجـان إمعمـول
=======واضربني ضرب قـوات احتــــــــــــــــــــــلال
واطلعوني سحب مانيـب إمحمـول
======= ساعتن بالشمس مانـي بالظــــــــــــــــــلال
الشعر منحاس والوجـه إمعفـول
======= والثيـاب امقطعـاتـن والنـعـــــــــــــــــــــال
كنـي اللـي آكلـن كيلـو هلـول
======= ريحت(ن) ماهيـب حتـى بالخيــــــــــــــــــــال
وعقب هذا صرت أذل من الذلـول
======= تركب(ن)ام العيـال بـلا إحـبــــــــــــــــــــال
وكل يوم(ن) تركبن مثـل الرحـول
======= مشيتـي سيـده ولا فيهـا ميــــــــــــــــــــــال
وقالت اركب واعتمر بي يالبطـول
======= واسأل الله يغفر إذنوب (ن) إثقـــــــــــــــال
وبالمطاف الناس يطافـون حـول
======= بيت رب البيت ربــــي ذا الجــــــــــــــــــلال
إلا انا مـن بدهـم تقـل إمهبـول
======= ما أطــوف امـشي من الذلـه عــــــــــــــدال
ودق قلبـي مثـل دقـات الطبـول
======= لا حكوا بالـــسوق او جا لـه مجـــــــــــــال